Inaguracion do Complexo Deportivo "Alvaro Pino"

As sete da tarde do vindeiro sábado, 16 de outubro, o presidente da Deputación Provincial, Rafael Louzán, o alcalde de Ponteareas, Salvador González Solla e Álvaro Pino, inaugurarán as instalacións do novo Pavillón Municipal de Deportes e da pista de padel do Complexo Deportivo do Reiro, que pasará a denominarse, dende ese momento, Complexo Deportivo “Álvaro Pino”.
O novo Pavillón Deportivo está emprazado a carón do xa existente e conta con todos os servizos esixibles a unha instalación destas características amais de estar dotada cos máis modernos equipamentos.
Para o concelleiro de Deportes do Concello de Ponteareas, Alberto Novoa, este novo equipamento suporá “o reforzo necesario para evitar a masificación que, na actualidade, ten o actual pavillón municipal, pensado hai anos para una poboación moito máis reducida da que actualmente ten Ponteareas”.
Novoa afirmou que, con este novo pavillón e a pista de padel que tamén se inaugurará o sábado, “dáse resposta a unha demanda cidadá que había deste tipo de infraestruturas sen renunciar, chegado o momento, a que Ponteareas poia contar con outro pavillón polideportivo mais, que garanta as necesidades dos usuarios durante os anos futuros”.
Pola súa banda, o alcalde de Ponteareas, Salvador González Solla, explicaba que a inauguración das dúas novas dotacións do Complexo Deportivo “Álvaro Pino”, “amosan a importancia que o Concello de Ponteareas lle dá ao deporte, tanto dende súa óptica de competición como de mantemento da saúde, e que fai necesario que os veciños e veciñas poidan contar cuns medios dignos para poder practicalo”.
Nese sentido, o alcalde ponteareán, lembrou que o actual pavillón municipal dos deportes, a carón do que o sábado se inaugurará o novo polideportivo, “foi obxecto, non hai moito tempo, dunha fonda remodelación que o converteu nunha infraestrutura moderna, funcional e capaz de albergar calquera evento deportivo, como o amosan os partidos internacionais de hóckey a patíns, ou a final da Copa Galicia de Baloncesto masculino”.